Psalms 103

A varmari kai God

Kai David.

1A tulungeagu, una pite pa ra Luluai,
Ma ra balagu par na pite pa ra lia na iangina.
2A tulungeagu, una pite pa ra Luluai,
Ma koko una valubane kana lavur vartabar piram:
3I nur vue kaum lavur varpiam;
I valagar u ta kaum lavur minait;
4I valaun u kan ra vinirua;
I vi puar u ma ra varmari ma ra bala na varmari;
5I tabar vamaur u ma ra bo na magit,
Upi na kalamana mulai ra dekdekim da ra dekdek i ra minigulai.

6Ra Luluai i pait ra takodo na mangamangana,
Ma i varvarkurai maravut diat par di ki taun diat.
7I ga vaarike tar kana lavur mangamangana tai Moses
Ma kana lavur papalum ta ra tarai Israel;
8Ra Luluai i buka ma ra varmari, a tena varmari tuna,
Pa i kankan lulut, ma i peal kana lavur varmari.
9Pa na varbor vatikai;
Ma kana kulot pa na tur tukum.
10Pa i obo pa kada lavur varpiam;
Ma pa i bali kada lavur bilak na mangamangana ta dat.
11Tago da ra bala na bakut i ki arama liu iat,
Damana i ngala kana lavur varmari tadav diat dia ru ia.
12Da ra ngu na gunan ra matana keake i vana rikai tana i vailik kan ra ngu na gunan i ki ong tana,
Damana i tak vakari vue kada lavur varpiam kan dat.
13Da tika na tutana i mari ra umana natuna,
Damana ra Luluai i mari diat dia ru ia.
14Tago i nunure ra mangana pal a paka i dat,
I nuk pa dat, tago dat a tobon ika.

15Ma ra tarai, kadia nilaun i da ra vura;
Dia tavua da ra pupu na davai.
16Tago ba ra ubar i vuvu tadav diat, dia panie ke,
Ma pa di nunure mule kadia turtur.
17Ma ga ra varmari kai ra Luluai i tur tukum pire diat dia ru ia,
Ma kana mangamangana takodo pire ra lavur bul mur ta diat;
18Pire diat dia torom ta kana kunubu,
Ma pire diat dia nuk pa kana lavur vartuluai upi diat a pait diat.

19Ra Luluai i tar vatur kana kiki na king arama ra bala na bakut,
Ma i kure ra lavur magit par.
20Avat kana lavur angelo, avat a pite pa ra Luluai,
Avat ba ava ongor kakit, ma ava pait ot pa kana lavur vartuluai,
Ma ava torom ta kana lavur tinata.
21Avat kana lavur kor, avat a pite pa ra Luluai;
Avat kana lavur tultul ba ava pait ot pa kana mamainga.
Avat kana lavur papalum, avat a pite pa ra Luluai,
Ta ra lavur gunan i varkurai tana;
A tulungeagu, una pite pa ra Luluai.
22